नताशा आव्हाड यांच्या भूमिकेवर जितेंद्र आव्हाडांचा स्पष्टीकरण; म्हणाले, 'पवार साहेबांचे उपकार'
राष्ट्रवादी काँग्रेसमध्ये डिलिमिटेशन विधेयकाला पाठिंबा देण्यावरुन वाद निर्माण झाला आहे. आमदार जितेंद्र आव्हाड यांची कन्या नताशा आव्हाड यांनी पक्षाच्या विरोधात उघडपणे भूमिका घेतली. या प्रकरणावर जितेंद्र आव्हाड यांनी प्रतिक्रिया देताना शरद पवार यांच्याबद्दल महत्त्वाचा मुद्दा मांडला आहे.
राष्ट्रवादी काँग्रेसच्या शरद पवार गटात डिलिमिटेशन विधेयकाला पाठिंबा देण्यावरुन सध्या तीव्र अंतर्गत मतभेद दिसून येत आहेत. या वादात आमदार जितेंद्र आव्हाड यांची कन्या आणि पक्षाच्या युवक आघाडीच्या सरचिटणीस नताशा आव्हाड यांनी थेट पक्षाच्या विरोधात उभे राहिल्याने राजकीय वर्तुळात चर्चांना उधाण आले आहे. डिलिमिटेशनला समर्थन देणे म्हणजे भाजपला राजकीय फायदा मिळवून देण्यासारखे असल्याचे नताशा आव्हाड यांनी स्पष्ट केले होते. त्यांच्या या भूमिकेवरुन पक्षात नाराजीचे सूर उमटत असताना, जितेंद्र आव्हाड यांनी एका पत्रकार परिषदेतून आपली आणि पक्षाच्या वरिष्ठ नेतृत्वाची भूमिका स्पष्ट केली आहे.
नताशा आव्हाड यांनी सोशल मीडियावर पोस्ट करत डिलिमिटेशन बिलाला पाठिंबा देण्याच्या पक्षाच्या विचाराचा तीव्र शब्दांत निषेध केला होता. मतदारांची वाढती लोकसंख्या लक्षात घेता पुनर्रचना आवश्यक असली, तरी हे प्रस्तावित विधेयक विरोधकांची ताकद आणि मिळणाऱ्या जागांची संख्या रोखण्यासाठी आणले गेले आहे, असा त्यांचा आरोप होता. भारतीय जनता पक्षाला राजकीय फायदा मिळवून देण्याचा हा घटनाबाह्य आणि सुनियोजित प्रयत्न असल्याचे नताशा आव्हाड यांनी म्हटले. भाजपची लोकप्रियता घसरत चालली असून, सत्तेला टिकवून ठेवण्यासाठीचा हा शेवटचा केविलवाणा खटाटोप असल्याचे त्यांनी सांगितले. देशाची लोकशाही व्यवस्था शाबूत ठेवण्यासाठी सर्वांनी या बिलाला कडाडून विरोध करावा, अशी अपेक्षा त्यांनी व्यक्त केली. पक्षाने आपल्या भूमिकेचा गांभीर्याने फेरविचार करावा, असेही त्यांनी आवाहन केले.
मुलीने पक्षाच्या भूमिकेविरोधात उघडपणे बोलल्यावर आमदार जितेंद्र आव्हाड यांनी प्रतिक्रिया देताना कुटुंबातील स्वातंत्र्याचा मुद्दा मांडला. "मुलीच्या स्वातंत्र्यावर अंकुश ठेवण्याचे काम घरातल्या कुणीही केलेले नाही. त्यामुळे तिने काय बोलावे आणि बोलू ही फार लांबची गोष्ट आहे. या स्वातंत्र्याचा उपभोग ती घेतेय," असे आव्हाड म्हणाले. पवार साहेबांच्या उपकारांचा उल्लेख करत त्यांनी पुढे स्पष्ट केले की, "आमच्या कुटुंबावर, माझ्यावर आणि माझ्या मुलीवर पवार साहेबांचे जे उपकार आहेत, त्याची परतफेड आम्ही या जन्मात तरी करू शकणार नाही. हे मला समजते, पण कदाचित तिला समजत नाही."
शरद पवार यांच्याबद्दल बोलताना जितेंद्र आव्हाड यांनी त्यांची लोकशाहीवादी भूमिका उघडकीस आणली. "शरद पवार हे लोकशाहीवादी आहेत. तुझ्या मुलीला गप्प बसव, तिला बोलू देऊ नको, असं ते म्हणणार नाही. उलट, 'तू शांत बस, तिला बोलू दे,' असे शरद पवार म्हणतील, हे मला माहिती आहे," असे आव्हाड यांनी स्पष्ट केले. ती बोलली आता ते काढू शकत नाही, असे सांगत त्यांनी आपल्या राजकीय स्थितीचाही उल्लेख केला. "माझी सत्ता शरद पवार आहेत. त्यामुळे शरद पवारांपुढे ही गणितं संपून जातात," असे आव्हाड यांनी ठामपणे नमूद केले.
नताशा आव्हाड यांच्या भूमिकेमुळे पक्षांतून कोणत्या प्रकारच्या प्रतिक्रिया येतात, याकडे संपूर्ण राजकारणाचे लक्ष लागले आहे. डिलिमिटेशन विधेयकाला पाठिंबा देण्याचा निर्णय पक्षाने घेतल्यास त्याचा परिणाम पक्षाच्या एकतेवर आणि निवडणूक रणनीतीवर कसा होईल, हे लवकरच स्पष्ट होईल.
D.Wason--BD